【專家分析】美CPU及GPU股長揸有驚喜？

【Now財經台】費城半導體指數(SOX)受惠於存取記憶體(DRAM)、中央處理器(CPU)及圖形處理器(GPU)相關股表現，連升16日，係史上最長升浪，南韓科企龍頭之一SK海力士第1季收入52.28萬億韓圜，超預期，SK海力士嘅亮麗表現可唔可以令全球晶片股延續強勢？

東亞證券高級投資策略師陳偉聰認為，現時全球人工智能(AI)發展升級速度好快，需求增長亦好勁，令高頻寬記憶體(HBM)及其他內存晶片受惠。佢又提及，過去儲存晶片價格升得多，SK海力士及三星電子(Samsung Electronics)相關業務佔比大，加上市場亦預期美國相關股份業績超預期，因此，股價未來有機會回調之後再破頂，相信市場亦會憧憬晶片股未來繼續造好。

Jason又話，雖然DRAM係短期內最短缺嘅零件，價格亦大升，不過，由於行業嘅周期性會令DRAM股價未來存在不確定性，因此，只適合短炒，相反，GPU及CPU會分別受惠於AI模型訓練，以及人工智能代理(AI Agent)產品涉及嘅推理和任務，需求量會維持一定水平，因此，相關股份做中線部署可能有更大驚喜。