【專家分析】台積電今季毛利率好難估

【Now財經台】台積電(TSMC)今日(16日)喺台股收市後出咗季績，首季純利5725億元新台幣，按年大升58%，創新高，毛利率升至66.2%，台積電強勁增長，係咪反映地緣政局反而刺激科企加快落單？

耀才證券研究部總監植耀輝指，未必可以咁講，見到台積電年初至今嘅增長、營收數據已經好強勁，相信市場都已經預計到，只不過今次季績大數出到嚟理想，毛利率高達66.2%，喺高基數下仍可保持強勁增長，的確為市場帶嚟少少驚喜。

展望第2季，台積電表現係咪仍然可以睇好，Stanley坦言，今季變數大兼不確定性高，因為戰事會影響台積電原材料供應，不過，相信集團有一定庫存，所以短線應該冇太大問題，不過，一旦戰事拖長就好難講，所以今季毛利率都幾難估，能夠保持到都收貨。

股價方面，Stanley指出，睇返現時估值，現價仍算吸引，建議投資者有貨可以繼續揸住先。