【專家分析】點解油價飆油企都變輸家？

【Now財經台】美伊日前同意停戰兩周，停火期間船隻可以安全通過霍爾木茲海峽(Strait of Hormuz)，市場樂觀情緒急升溫，美股3大指數昨晚(8日)狂飆，其中，道指收市勁升1384點，不過，油價暴跌，紐約期油一度急瀉逾20%。美股業績期快將展開，其中，美國能源行業龍頭埃克森美孚(ExxonMobil)預告，戰事中斷煉油業務將令收益損失4億至8億美元，點解喺油價高企下，反而不利油企？

東亞證券高級投資策略師陳偉聰認為，埃克森喺卡塔爾嘅液化天然氣設施受到破壞，要完全恢復及重新投產需時，當中會涉及額外成本，所以不利短期能源產出。佢續指，雖然集團第1季業績因油價飆70%至近1倍而造好，但受油價降溫、航運成本存在不確定性、企業未能及時大量供應能源等因素影響，能源企業喺第2及第3季仍要面對較大衝擊，因此，戰事推升油價，唔一定對能源企業及油股帶來絕對正面影響。

Jason又話，油價急升對美國工業、製造業、交通運輸行業嘅實際影響，會喺第2及3季陸續反映，至於其他板塊受影響程度有幾大，就要視乎停戰時間先可以再判斷。