【名家給力場】市場向聯儲局發出「加息」訊號？(下)

【Now財經台】美伊戰事持續，美國總統特朗普(Donald Trump)於周一(21日)將攻擊伊朗能源設施嘅「最後通牒」由「48小時變5日」，另一方面又話兩國已經埋枱傾緊。由於市場解讀為特朗普又TACO，對美股及債市都有影響，依家美國10年期債息約4.34厘，而2年期債息已高過聯邦基金利率，呢兩個數據對市場及聯儲局有咩影響？

「股市漁夫」創辦人莊志雄認為，特朗普始終係一個生意人，每個舉動都會考慮到債市及股市，現時10年期債息處於4.3厘及4.5厘嘅關鍵水平，市場都憧憬美國及伊朗有偈傾，所以10年期債息有機會進一步回落至4.3厘。

佢續指，特朗普依家TACO會令多國投資者重新檢視係咪仲要買咁多美債﹐還是轉買資源比較好，而昨晚(24日)2年期美債拍賣反應係3年以來最差，呢個正正係主要原因。

Lewis續稱，聯儲局過往會參考2年期債息去做決策，現時已經高過聯邦基金利率，代表市場現正向聯儲局發出「加息」訊號。佢認為，當經濟周期向下，聯儲局又加息，就好似疫情前聯邦基金利率高於消費物價指數(CPI)嘅情況，令市場出現一個負實質利率，甚至經濟陷入衰退，加上市傳聯儲局內部認為失業率及通脹會持續上升，會帶嚟一定滯脹(Stagflation)風險，最終或對市場造成嚴重嘅負面攻擊，拖累美國甚至環球經濟。