【專家分析】蜜雪加盟店變抗「內捲」神器？

【Now財經台】蜜雪集團(02097)今日(24日)中午出咗去年業績，交咗一份亮麗嘅成績表，收入按年增長35%至335億人仔，純利就按年增長33%至59億人仔，雖然整體毛利率微跌，但蜜雪股價午後走強，一度飆逾8%，高見350元，點睇呢份成績表？

天風國際證券研究部主管李偉傑指，蜜雪呢份成績表有驚喜，尤其去年下半年收入及盈利增速都比之前好，令市場信心大增，雖然整體毛利率微跌，但加盟店毛利率表現仍然理想，蜜雪本質上都係靠龐大嘅加盟網絡，維持高毛利及高盈利增速，現時加盟店表現理想，可以抵禦到內地市場嘅「內捲」壓力。

Jason又話，蜜雪積極重組海外布局，希望搵到更高毛利率嘅市場，例如進軍哈薩克斯坦及美國，國內方面就繼續深耕三線城市，以對應其較低嘅定價。

此外，集團早前併購啤酒品牌，某程度上係測試唔同銷售領域嘅可能性，相信對有意創業嘅人士有吸引力，進一步發揮集團加盟模式。