【專家分析】特朗普又縮怕「打」冧股市？

【Now財經台】美國總統特朗普(Donald Trump)向伊朗發出「48小時最後通牒」後，突然喺本港時間昨晚(23日)7點左右話，將「死線」推遲5日，又話同伊朗嘅對話有成效，但之後遭伊朗摑一巴，否認同美國談判。

特朗普喺美股兩大指數自高位回調近10%之際，突然出手為場戰事降溫，可能考慮到今年有中期選舉，唔想美股喺大選前冧市，特朗普出手後，油價一度應聲急挫14%，債息急回，美股昨晚盤中一度彈逾千點，呢場戰事係咪唔會拖太耐？

高富金融集團投資總監梁偉民坦言，唔會睇得太過樂觀，雖然特朗普昨日為市場送上驚喜，但唔代表係停戰，美軍會撤出中東，而市場最關注一定係伊朗係咪會解封霍爾木茲海峽(Strait of Hormuz)，就呢啲問題下定論依家仲係言之尚早，特朗普向伊朗施壓冇成效，就被迫暫緩攻擊，美國一直唔敢攻擊能源設施，主要係擔心伊朗會作出大規模亡命報復，怕承受唔到當中嘅後果。

Wyman又話，伊朗開出嘅停火條件，其中最關鍵係要美國保證唔會再攻擊伊朗，估計特朗普好大機會唔接受，而戰事會持續幾個星期，甚至1至2個月。

金融市場方面，佢指出，睇返股市、債市、油價今日(24日)都開始縮緊，反映樂觀情緒冇昨日咁高漲之餘，亦顯示仍未睇到停火曙光。