【Now財經台】據土地註冊處數據顯示，2月二手居屋登記合共451宗，按月減少約18%，整體成交金額則跌約16%至逾18億元，明明樓市氣氛十分熾熱，但點解二手居屋成交價量齊跌？
利嘉閣研究部主管陳海潮表示，主要受兩個因素影響，首先係「白居二」購買證入市熱潮已開始退卻，變相持證但未入市嘅買家會相對再觀望一段時間，其次係政府將於第2季推出「居屋2025」，大部分買家都轉向抽一手新居屋，所以導致二手居屋成交金額下跌。
Derek又話，因為之前3個月消化咗唔少盤源，盤源仍有待補充，因此，2月二手居屋成交宗數減少，亦係4個月以來最淡靜。
此外，睇返2月二手居屋成交，樓價300萬至500萬元樓下佔約70%，但500萬元以上喺1月及2月都係90宗，有冇錄得一啲較大額成交，呎價可以造到幾多？
陳海潮指，其實都有大額成交，例如油麻地富榮花園，一個位於高層，面積逾500平方呎嘅單位，成交呎價逾14000元，係2月二手居屋最高成交呎價。
