【名家給力場】聯儲局短期傾向「以不變應萬變」

【Now財經台】美國聯儲局結束中東爆發戰事後首個議息會議，一如市場預期，局方維持利率不變，而反映官員對未來利率走向預測嘅點陣圖(dot plot)顯示，繼續預期今年減息1次，2027年減息1次嘅預測不變，點睇今次議息結果？點評估聯儲局未來嘅減息步伐？

臻享顧問董事總經理王良享指，聯儲局今次繼續按兵不動，反映局方比之前更審慎，始終依家仲打緊仗，油價持續高企，通脹自然有幾個月會升咗上去，最初會先推高整體通脹，去到5月、6月，估計核心通脹都跟升，除非戰事提早結束，通脹先有機會回落返少少。

Tommy又話，美國政府啟動新一輪301調查，關稅水平有機會由現時15%，調高至更高水平，聯儲局主席鮑威爾(Jerome Powell)都提及，未來減唔減息仍要視乎由關稅引發嘅貨物通脹，會唔會喺近期回落，同埋點陣圖都顯示，依家減息門檻較高，佢估計，聯儲局短期會傾向所有嘢維持不變。