【中國建設銀行(亞洲) 呈獻:FINTERVIEW】中東停火無期貴油有排捱(上)

【Now財經台】中東戰事持續，局勢發展仍然唔明朗，油價持續高企，紐約期油及倫敦布蘭特期油分別升至每桶100美元及110美元，最新報96.5美元及112.5美元。不過，個別國家周一(16日)已開始釋放石油儲備，另一方面，有報道指，個別油輪可成功通過霍爾木茲海峽(Strait of Hormuz)，係咪可以遏制油價升勢？

富邦銀行(香港)投資策略及研究部主管潘國光指，戰事對紐油及布油實際影響唔大，反而中東油價包括迪拜升上130美元至150美元，先係最受戰事衝擊。佢又提及，中東油價高企主要受霍爾木茲海峽影響，同埋部分油輪受襲所致，令出口至中南亞國家嘅石油減少，大約佔全球約20%。

佢又認為，即使戰爭結束，但手尾仍好長，例如須清理魚雷，以及需要一段長時間重建和重啟被破壞嘅設施，加上保險公司認為戰爭風險仍然存在，導致保費增加，因此，油價現水平僅反映局部情況，

佢又講到，真實風險會因為每個國家所受嘅影響唔同而有變，例如泰國需要能源要管制、中國就因自身石油及天然氣儲備高且使用率唔高，又有俄羅斯石油支持，因令影響相對其他亞洲國家少。

佢相信，戰事唔會喺未來1個星期內結束，油市仍會波動，美國石油會因內部管制而企穩100美元水平，而布油現時喺110美元水平，估計4月份仍有30美元至40美元上升空間，靠近中東石油價格水平。

金價方面，Vicks認為，市場已price in咗減息機會下降呢個因素，令唔少央行「放鷹」，繼而令美元轉強。至於中東國家就因為戰事而出現政治及金融危機，黃金作為打仗時期最安全嘅資產，價格近日繼續大升，政府或因石油能源收入下降，要將黃金套現作補貼及開支，國民則就會套現成現金去買必需品甚或機票。

Vicks又提到，能源價格上升令全球受到牽連，其中，香港政府都採取唔同財政措施，例如補貼運輸行業油價，以抵銷能源價格上升引發嘅通脹，甚至滯脹(Stagflation)。