【專家分析】伊朗石油大獵殺困局唔易拆

【Now財經台】伊朗局勢有新發展，新任最高領袖穆傑塔巴(Mojtaba Khamenei)發表強硬聲明，話要繼續封鎖霍爾木兹海峽(Strait of Hormuz)，國際能源署(IEA)就釋放4億桶石油儲備遏油價，美國亦出手，暫時容許購買滯留喺海上嘅俄羅斯石油，點睇未來局勢發展？

艾德金融投資執行董事文錦輝認為，依家嘅局面暫時好難化解，單靠釋放儲備解決唔到核心問題，就算IEA釋放石油，但霍爾木兹海峽一日打唔開，對運輸好大影響，雖然紅海等地區每日有逾200萬桶管道供應，但如果伊朗連紅海、阿曼灣都打埋，環球石油供應真係好棘手，要解決事件可能要搵伊朗嘅盟友出面傾，一旦戰事拖長，油價持續居高不下，投資者或會減持股票基金，會對股市造成好大影響。

Felix又話，唔到最後關頭都唔建議人為干預市場，以紐約期油為例，若美國過度干預，投資者或會轉向歐洲交易，就好似當年倫敦布蘭特期油咁，自由市場有本身嘅對沖機制，過度干預衍生品市場或會影響市場結構。