【全民打新】機械人股埃斯頓首掛睇升40%？

【Now財經台】有4隻計劃3月掛牌嘅新股，今日(27日)齊齊開始招股，分別係兆威機電(02692)、優樂賽共享(02649)、埃斯頓(02715)及美格智能(03268)，其中，兆威及埃斯頓都有依家最煞食嘅機械人概念，而本身亦已經喺A股上市，其中，埃斯頓招股價介乎15.36元至17元，入場費3434元，公司以生產工業機械人為主，人形機械人仍處於探索階段，公司去年扭虧為盈，雖然今年春晚後，機械人概念股炒作冷卻，但市場對呢個概念仍有憧憬，點睇埃斯頓前景？

高歌證券金融首席分析師聶振邦指，睇返埃斯頓業績，公司基本面冇太大問題，但要留意，公司去年成功扭虧，但勢頭可唔可以延續至今年。

聶Sir又話，雖然機械人概念有吸金力，但市場競爭激烈，加上埃斯頓嘅人形機械人仍處於起步階段，所以都要睇長線，但對上市初期表現唔會有好大影響，估計AH價差可以吸引到散戶認購，但未必可以一上市就收復全部價差，但有信心股價可以造好，估計首掛可以炒上22元至24元，若以招股價上限價計，即最多炒高約40%。