【中國建設銀行(亞洲) 呈獻:FINTERVIEW】特朗普全力為美股「護盤」因為...(上)

【Now財經台】雖然上周市場氣氛好差，但美股3大指數上周五(6日)升逾2%，其中，道指更歷史性衝破50000關，標普就再迫近7000點，點睇美股近日嘅強勢？

富邦銀行(香港)投資策略及研究部主管潘國光指，美國總統特朗普(Donald Trump)宣布聯儲局主席提名後，市場擔心局方未來嘅貨幣政策冇想象中咁寬鬆，加上科企資本開支大增，令市場對回本速度感到憂慮，但美股連日遭抛售後出現技術反彈，道指再創新高反映市底唔弱，只係有板塊輪動嘅情況。

Vicks又指，暫時美國6月前可減息嘅機會約70%，佢估計，聯儲局今年嘅貨幣及財政政策會維持寬鬆，因為共和黨暫時喺眾議院選舉大幅落後，白宮要喺刺激經濟方面有大動作，以維持美股強勢，繼而利好選舉形勢，因此，特朗普及聯儲局新主席都會喺財政及貨幣政策上有更多合作，令發債順利、債息唔會過度攀升、貨幣政策繼續寬鬆及繼續擴表，推動資產價格繼續上升。

佢續稱，暫時美股唔係處於一個好危險嘅狀況，若中段有修正，年中減息機會及「放水」力度可以增加，令美股下半年可以喺臨近選舉時上升。