【專家分析】美科企放榜後資金開始換馬

【Now財經台】美股昨晚(29日)個別發展，其中，納指受科企業績參差拖累，收市跌近1%，微軟(Microsoft)雲業務遜預期拖累股價急瀉10%，相反，Meta業績靚仔大升10%，雖然Tesla放榜後受壓，但市傳SpaceX考慮合併，Tesla盤後反彈，蘋果公司(Apple Inc.)股價受惠於大中華區銷售大升38%走強。大型科企出完業績後，可唔可以吸引資金再追入？

艾德金融投資執行董事文錦輝指，科企放榜後，關鍵係要睇埋指引，以Microsoft為例，雖然績後急瀉，但反而會吸引投資者，因為集團揸住好多Cash，有低位反彈嘅憧憬，反觀業績唔錯嘅科企，股價要再上可能會難啲，所以就會出現換馬嘅跡象。

至於美股後市，Felix認為，美企前景仍然向好，3大指數整固完之後有條件再升上，但佢提醒，投資者要留意美國總統特朗普(Donald Trump)喺環球政局嘅動作，會唔會令股市出現震盪，最關鍵係要睇住美債，一旦債息回落，美股今年首兩季仍會造好。