【名家給力場】聯儲局再減息要等下半年？

【Now財經台】美國聯儲局結束今年第一次議息會議，一如預期維持利率不變，主席鮑威爾(Jerome Powell)喺會後記者會，就未來減息步伐及其繼任人睇法成為市場焦點，而議息聲明就似乎偏鷹，美息未來會點走？據最新利率期貨顯示，3月好大機會繼續按兵不動。

臻享顧問董事總經理王良享表示，呢個預測似乎係最切合依家嘅時勢，去年連環減息主要係就業市場比較差，失業率上升，但依家大部分市場指標已重返中位水平，失業率亦回落，根據鮑威爾所講，現時政策仍有少少限制性，或者接近中性，意味依家唔係基於風險管理去減息，而係重返「正常化」，即約3厘水平。

至於美國就業市場未來半年係咪可以維持穩定，Tommy認為，美國增長唔係特別多，就業市場其實冇明顯改善，呢個都會係唔減息嘅唯一理由，佢又估計，美國通脹喺2027年有機會回落至2%水平，而聯儲局應該要今年下半年先至再減息。