【名家給力場】弱美元係長期化？(下)

【Now財經台】美國總統特朗普(Donald Trump)唔認為美元表現差，又或者跌得多，市場解讀為特朗普為美元貶值「開綠燈」，導致美匯指數一度插穿96，市場十分關注美元係咪會再跌，不過，特朗普經常一時一樣，取態可能第二日又唔同咗。到底美元係咪會大幅貶值，金價走勢係咪一個指標？

「股市漁夫」創辦人莊志雄認為，弱美元應該係長期化，只係唔知係咪一跌穿就一瀉如注，睇返以往嘅美匯熊市，自高位回落30%、40%都唔出奇，依家美匯指數跌穿咗2011年至今嘅15年長期上升軌，特朗普當選後已兩度下試呢個支持線，之後都彈返上去，今次再失守，佢認為可以再睇多一至兩星期，如果確認係長期大弱勢，依家自高位跌咗11%、12%，喺呢個情況下仍有好多空間可以做嘢。

Lewis又話，今年嘅大主題係好多落後嘅嘢會炒返上去，去年造得最好係貴金屬，大幅跑贏美股，其實係美元弱嘅訊號，特朗普當選咗272日，金價升咗近1倍，落後嘅金屬銀、銅、白金都喺去年第4季開始追返上嚟，部分甚至超越金。