【專家分析】聯儲局減息陷兩難考起鮑Sir

【Now財經台】美國今晚(9日)將會有唔少重磅消息及數據出爐，包括非農數據、最高法院公布對等關稅(Reciprocal Tariff)意見，甚至係裁決，市場估計，非農新增職位約7萬個，略多過2025年11月，不過，日前公布有「小非農」之稱嘅ADP就業數據就差過預期，預期今晚嘅非農數據都會偏弱，聯儲局月底減息機會係咪仍然偏高？

高富金融集團投資總監梁偉民認為，美國2026年上半年減息機會唔大，聯儲局依家處於一個兩難局面，面對美國就業市場顯著轉弱，而通脹就持續不明朗，雖然去年11月消費物價指數(CPI)輕微回落，但市場擔心呢個數字嘅準確性，因為期間有美國政府停擺事件，所以一定要睇實下周出爐嘅最新CPI數據，因為好影響聯儲局今年上半年嘅減息步伐。