【名家給力場】聯儲局買T-bills係咪QE前奏？(上)

【Now財經台】美國聯儲局今日(12日)起，每月購買400億美元短期債T-bills(1年內到期零息債券)，紓緩短期流動性問題，理論上唔算量化寬鬆(QE)，但道指昨晚(11日)破頂，資產市場反應唔算差，點睇買T-bills呢個動作？係咪QE前奏？

「股市漁夫」創辦人莊志雄指，今次嘅行為屬於準備量化寬鬆(Pre-QE)，對上一次最似今次係2019年，都係回購利率市場比較波動，波動較大嘅時候，聯儲局就會出來維持秩序。今次汲取咗2019年嘅經驗，提早做好準備，尤其喺交稅嘅月份，因為呢啲月份可能影響流動性，所以聯儲局要喺呢個月份之前做好準備。

Lewis又指，正式嘅QE係當央行將利率降到零之後，冇其他嘢可以做，唯有喺市場買長債，著重返長期資產，以支持整體經濟，作出刺激作用，主要目的為壓低長期利率。因此，聯儲局無論係今次定2019年嗰次，都表明唔係QE，佢哋買T-bills旨在提供短期流動性，而非壓低長期利率。

他續指，今次同上次都有同樣嘅背景，都係經濟周期轉弱，以及收稅太多令流動性變差，喺兩件事情夾擊下，令聯儲局要出手維持秩序。