【專家分析】科企PE太貴或拖冧美股

【Now財經台】美國政府停擺風波有望喺幾日之內正式結束，睇返對上一次停擺結束後，即2018/19年，標指、金價喺1個月後分別升咗約5%及約2%，再睇埋歷史數據，11月係美股全年表現最好嘅月份之一，今個月都見到具指標性嘅Palantir及英偉達(Nvidia)股價反彈力度好強，市場係咪又將估值貴呢個問題擺埋一邊？

高富金融集團投資總監梁偉民指，市場上星期仍擔心科技股估值貴問題，導致相關股份經歷咗兩日較深嘅調整，但昨日(10日)政府停擺有望結束消息帶動，股價出現反彈，但佢認為，宜再觀察多幾日，睇下市場係咪仍然對估值問題有戒心。

Wyman又話，市盈率(PE)去到咩水平叫做貴，甚至出現泡沫都係好主觀，如果同過去10年平均比較，PE確實有啲貴，個別科技公司股價上升幅度，已大幅拋離盈收增長，依家市場就係買呢啲公司嘅「未來」，佢又認為，PE貴會成為美股後市調整其中一個主要藉口，所以仍然要小心。