【專家分析】Nvidia今季增長要靠對華銷售Blackwell？

【Now財經台】美國人工智能(AI)晶片「股王」英偉達(Nvidia)出咗第2季業績，收入按年增長56%至逾467億美元，純利按年增長59%至逾264億美元，好過預期。雖然期內冇向中國客戶銷售H20晶片，但對收入影響唔大。雖然集團預期今季可以向中國付運最多50億美元H20晶片，但中美關係仍然緊張，係咪都唔可以忽視呢個問題？

東亞證券高級投資策略師陳偉聰指，Nvidia聲稱未來有機會向中國銷售H20晶片，但集團指引未完全反映到，可能公司對幾時再向中國銷售H20都存疑，就算美國總統特朗普(Donald Trump)「開綠燈」，但同中國推動晶片自給自足嘅方向背道而馳，所以中國未必會再依賴外國進口晶片，因此，呢方面嘅變數好大。

Jason又話，中國對高端晶片需求仍然好大，如果Nvidia未來可以向中國銷售更強嘅Blackwell，就會成為Nvidia未來增長嘅關鍵。