【名家給力場】美股現「契媽熱潮」2.0要小心？(下)

【Now財經台】納斯達克100指數連日回落，昨晚(19日)跌跌逾1%至21314點，納指中線市寬已跌穿50嘅強弱分界，係咪預示就算美國聯儲局減息，大市都已經反映得七七八八？美股後市會唔會出現回調？

「股市漁夫」創辦人莊志雄指，現階段要留意一啲高Beta、早前一窩蜂去炒嘅股份，情況就同2021年第1季「契媽熱潮」一樣，好多股票狂升，但之後好快就大跌。機構投資者唔會只買最大幾隻股份，而係增加對沖，依家嘅情況同2021年相似，所以有一定參考價值。

Lewis續指，未來40至50日有唔少重要事件可能會令波幅擴寬，包括Jackson Hole年會、英偉達(Nvidia)業績、8月非農數據、通脹數字。此外，要留意聯儲局主席鮑威爾(Jerome Powell)9月會唔會減息，若最終唔減息，投資者應提前部署。

佢又話，7月納指中線市寬跌穿50強弱分界，跌穿後要再回升有難度。「契媽」基金ARK Innovation ETF(ARKK)喺7月中開始見頂，之後畀市寬拉落嚟，依家超過一半呢類型嘅股份已經跌穿50天線，若指標跌到40以下，投資者就要小心指數會被大市拖累。