【專家分析】美PCE超預期通脹響警號？

【Now財經台】今日(1日)係美國暫緩向貿易伙伴徵收關稅嘅「死線」，白宮公布最新關稅稅率，美股昨晚(7月31日)喺7月最後一個交易日先升後跌，道指收市倒跌330點，不過，蘋果公司(Apple Inc.)股價受業績帶動，於收市後延長交易時段升3%，隨著新關稅生效，會點樣影響美股後市？

博威環球證券金融首席分析師聶振邦指，對等關稅(Reciprocal Tariff)生效後，市場主要關注關稅對美國經濟及通脹嘅實質影響，美國昨晚出爐嘅6月個人消費開支(PCE)物價指數按年升2.6%，核心PCE指數更升2.8%，令大市掉頭向下，但其實都係意料之內。

聶Sir又話，唔排除美股短期有沽壓，但由於8月係業績高峰期，若較多大型企業交靚業績，有機會紓緩跌勢，不過，若過咗業績期都冇乜利好消息，又或者通脹再升溫，到時就不利美股表現，現時資金流向科技股嘅機會較大，相信係因為受關稅影響較細，但零售壓力就會大啲。