【FINTERVIEW】聯儲局或最遲9月要減息因為...(上)

【Now財經台】美國今個星期有多項重磅數據出爐，包括7月個人消費支出(PCE)物價指數、有「小非農」之稱嘅ADP私人企業就業職位、非農就業指數等，當中有咩要留意？會唔會令聯儲局提前減息？

富邦銀行(香港)投資策略及研究部主管潘國光指，雖然第1季國內生產總值(GDP)及6月ADP錄得負數，但市場估計，第2季GDP將按年增長約2.4%，而7月大小非農估計約10萬，所以大小非農數據要低過10萬唔難。佢又提醒，當「大非農」都低過10萬時，減息壓力就會增加。

Vicks補充，如果第2季GDP企唔穩2%以上，再加上關稅因素，第3季GDP可能會再低啲，因為下半年受關稅效應影響，有機會推高通脹，繼而壓低GDP，因此，佢認為今個星期嘅數據都重要，若第2季GDP及大小非農都唔好，就算今個星期唔減息，聯儲局9月減息機會都好大。