【專家分析】金管局不斷「接錢」對港股有咩影響？

【Now財經台】港匯5月初開始持續轉強，多次觸及7.75強方兌換保證，金融管理局喺短短幾日內，連番出手承接美元沽盤，合共向市場注入約1290億元，不過，自6月26日開始，金管局喺聯匯制度下，合共買入逾720億港元，意味當初流入本港嘅資金流走咗逾半，對港股及市場資金面有咩影響？

博威環球證券金融首席分析師聶振邦認為，資金流入及流出同港股之前嘅強勢，以及現時嘅橫行格局有好大關連性。睇返5月初港匯觸及強方兌換保證，到6月26日觸及弱方兌換保證，期間港股走勢唔錯，但6月26日恒生指數開始轉弱，並回落至24000點水平。

聶Sir續指，依家港匯再度觸及弱方兌換保證，令港股沽壓變大，所以要關注恒指喺23800點水平有冇支持，但如果因港匯走弱令恒指跌穿23800點水平，下行壓力就會較大，可能要喺23000點至23200點水平先可以有支持。