【專家分析】WhatsApp加廣告唔會爆「轉會潮」

【Now財經台】美國科技股繼續強勢，納指昨晚(16日)收市升294點或1.5%，升穿19700點，其中，Meta股價升近3%，應該同集團旗下WhatsApp計劃引入廣告有關。Meta要投資人工智能(AI)之餘，最近又用400億美元收購AI初創SCALE AI，係咪因為咁要開拓新收入來源？加入廣告後會唔會影響用家使用度？

高富金融集團投資總監梁偉民指，使用感受一定有影響，部分用家可能會覺得冇咁好用之餘，亦可能有負面感覺，不過，係咪會即時令大量用家「轉會」？依家市面上可以同WhatsApp競爭，又或者較具威脅嘅平台其實唔多，所以未來都要視乎個廣告量，同埋使用感受影響到底有幾大。

Wyman又話，相信Meta都會睇住情況，唔會一下子加入大量廣告，導致使用感受大幅轉差，始終集團都會擔心用戶流失問題，又認為Meta現階段只係試水溫，唔會係一個主要收入來源，事實上，WhatsApp一直對Meta都冇乜收入貢獻。