【專家分析】騰訊想買Nexon點解炒唔起股價？

【Now財經台】市傳騰訊控股(00700)想買雙方已有長年合作關係，南韓遊戲巨頭Nexon創辦人家族手持嘅67%股權，一旦成事，估計作價高達520億港元。受消息帶動，Nexon日本股價今日(13日)一度急升10%，不過，騰訊股價反覆靠穩，僅一度升1%，高見515.5元，呢單deal又可唔可以為騰訊帶嚟增長動力？

亨達財富管理董事總經理姚浩然指，睇返呢單交易，估計Nexon可直接受惠，而騰訊收購Nexon後，發行費將會大減，由於成本下降，未來可以推更多遊戲，不過，呢啲交易嘅效益要一段時間先會浮現，因此，騰訊股價相對冷靜。

佢續指，近期資金主要追入以收息為主嘅板塊，例如內銀及電訊，令科技股動力不足，呢個亦係騰訊股價今日冇乜變動嘅原因。

Patrick又話，騰訊平台規模龐大，涉及大量遊戲，若某款遊戲跑出，成為爆款IP，將帶動集團收入增長，繼而刺激股價。