【專家分析】小鵬可唔可以靠G7「止血」？

【Now財經台】小鵬汽車(09868)股價今日(12日)全日受壓，尾市一度挫6.7%，低見76.3元，幾乎完全蒸發之前3連升嘅升幅，小鵬新車G7預售價由23.58萬人仔起，新車配合華為「黑科技」AR-HUD技術方案，即擋風玻璃上可以睇到導航、時速等資訊，新車預售唔夠1個鐘，已經有過萬部車落咗細訂，估計下季上市及交付，集團早前話，有信心今年第4季扭虧，G7預售反應理想，扭虧目標係咪有望達到？

耀才證券研究部總監植耀輝指，對小鵬係咪咁易扭虧有保留，最近汽車行業一直傳出唔同消息，行內競爭仍十分激烈，雖然推出新車有助增加定單量，但亦有可能令舊車款囤貨，甚至要減價促銷，對盈利有負面影響。

佢又指，小鵬計劃斥資約45億人仔研發人工智能(AI)，雖然投資AI係大勢所趨，因為企業要維持競爭力，但會對現金流造成一定壓力，所以小鵬係咪可以成功扭虧仍要觀察。