【專家分析】毛戈平基投今解禁即沽貨？

【Now財經台】毛戈平(01318)基石投資者半年禁售期今日(10日)屆滿，股價午後跌幅擴大，一度挫逾4%，低見108元，今日開市前已錄得1宗「X」盤，即賣買雙方已傾掂咗交易，然後股份再上板，涉及475萬股，每股作價107.5元，較昨日(9日)收市價有4.8%折讓，涉資逾4.9億元，係咪基投一解禁即掟貨？

信達國際研究部董事趙晞文認為，好大機會係基投沽貨，但到底係邊個就無從稽考，因為一般投資者唔會用呢種方法出售手上嘅持股，所以似係機構投資者操作，不過，今次減持股數及折讓幅度唔算大，所以機投趁高位鎖定部分利潤及持倉係合理。

晞文又話，毛戈平股價過去一段時間已累積咗唔少升幅，所以一旦有機投減持，股價會面臨一定壓力，不過，由於呢類新零售股仍有資金追捧，所以跌幅未至於太大。