【專家分析】由WWDC睇Apple前景

【Now財經台】蘋果公司(Apple Inc.)昨日(9日)舉行全球開發者大會(WWDC 2025)，雖然推出多款新產品及新功能，包括在iPhone及Apple Watch等引入液態玻璃(Liquid Glass)，但欠重大驚喜，市場最關注嘅人工智能(AI)發展又冇突破，Apple股價昨晚(9日)亦要跌，依家仍未補到4月初嘅下跌裂口，點睇Apple前景？

高富金融集團投資總監梁偉民指，過去1年，市場一直憧憬AI發展會帶動iPhone等產品銷售，但過去幾季嘅業績都睇唔到成效，主要係集團嘅AI發展滿足唔到市場期望，又冇創新功能，吸引唔到消費者，更冇辦法掀起「換機潮」。

Ｗyman續指，雖然Apple盈利仍有雙位數增長，但預期收入僅增長3%至4%，屬於低水平，現時市盈率(PE)約28倍，估值唔算平，對Apple股價冇正面推動力。佢又話，集團最近官司纏身，包括反壟斷問題，App Store又要被迫開放，加上搜尋器市場同Google嘅合作又要中斷，呢啲因素會影響集團收入及股價短期表現。