【專家分析】METALIGHT揸中長線有得諗

【Now財經台】新股元光科技(METALIGHT)(02605)將於明日(10日)首掛，係內地實時公交訊息平台「車來了」母公司，免費為用戶提供實時、準確嘅公車到達訊息，主要靠咩賺錢？METALIGHT股東背景都好夠份量，阿里巴巴(09988)及滴滴都有份投資，中長線投資價值有幾大？

博威環球證券金融首席分析師聶振邦指，METALIGHT收入主要來自廣告收入，過去兩年，收入都錄得雙位數增長，反映有一定盈利基礎，所以有中長線投資價值。

聶Sir又話，雖然METALIGHT有客戶過度集中問題，但短期會有優勢，因為有助公司加快發展，收入及盈利都可以受惠，不過，中長線而言，客戶集中度問題須作出調整。

佢又話，以METALIGHT招股價9.75元計，市銷率(PS)約6.8倍，但廣告行業平均約10倍，反映股價有折讓。此外，雖然公司收入增長放緩，但仍能維持雙位數字增長，如果未來兩年可以保持逾10%增長，好大機會可以扭虧為盈，所以前景可以睇高一線。