【期匯決算】歐元挑戰1.14有難度？

【Now財經台】美國關稅政策造成亂局，更令市場對美元信心大減，拋售美元資產，歐洲央行行長拉加德(Christine Lagarde)呼籲把握提升歐元全球地位嘅機會，成為美元替代品，要提升歐元喺全球嘅使用量係咪好難？ 美國押後加歐盟關稅嘅消息一出，歐元應聲反彈，重上1.14水平，衝上1個月高位，但拉加德發言後，市場似乎冇乜反應，1.14係咪有較大阻力？

連連STAR FX總經理陳欣指，去美元化唔係10年8載可以成事，而歐元想取代美元，仍有一段好漫長嘅路要行，歐元嘅出現就係要抗衡美元，但歐元區嘅內部矛盾好嚴重，成為歐元擴大結算佔比嘅最大阻力。

佢又話，歐元要突破1.14關口唔容易，不過，若美元持續弱勢，美國聯儲局繼續偏鴿，都會有利歐元挑戰1.14水平，甚至1.15水平，但要突破1.16難度好高。