【FINTERVIEW】內地Q2經濟增長有機「保5」

【Now財經台】國家統計局今早(19日)出咗多項重磅經濟數據，其中，4月工業增加值按年升6.1%，好過市場預期，不過，社會消費品及固定資產投資就按年增長5.1%和4%，差過預期，今次嘅數據有咩啟示？點評估未來經濟增長情況？

富邦銀行(香港)投資策略及研究部主管潘國光指，環球股市4月初受美股大跌拖累，整體投資市場偏弱，負面投資情緒高漲，影響投資者信心，不過，5月開始見到外貿逐步回升，航運業有改善，估計內地第2季經濟增長有機會維持5%。

佢又話，現階段唔太擔心內地經濟，因為政府一直推出唔同措施撐經濟，亦好清楚關稅戰係一場持久戰，依家有90日「休戰期」，反映中美都希望關稅戰進一步降溫，佢預期，全球經濟喺第3、第4季都會放緩，但唔需要太擔心。