【名家給力場】中美中期大選前要「傾掂數」因為...

【Now財經台】美國昨晚(8日)同英國達成今輪貿易戰以嚟首份貿易協議，帶動美股3大指數隔晚一度大升，收市升0.5%至逾1%，升幅收窄係受富人稅消息拖累，中美今個周末就會展開貿易談判，會點反映喺美股身上？會唔會好似英美一樣傳嚟好消息？

冠域商業及經濟研究中心主任關焯照指，美英達成今輪貿易戰首份協議，市場認為氣氛好轉，但英國唔係美國主要入口嘅貿易伙伴，所以重要性唔大，投資者唔好將美英協議睇得太重。

關博士又話，依家中國係美國第2大入口國，所以要達成協議嘅難度幾高，timing上係對美國不利，因為特朗普(Donald Trump)嘅民望愈嚟愈低落，加上唔可以將關稅拖延到中期大選之後，最少要喺明年初之前同中國傾掂數，所以有好大迫切性，佢估計，美國最後只會向中國貨品加徵20%至25%關稅。