【專家分析】小心波音股價隨時「降落」

【Now財經台】美國跟英國達成貿易協議，英國同意增加美國農產品進口，美國牛肉關稅降到接近零水平，並承諾採購總值100億美元嘅波音(Boeing)飛機，美國就會下調英國汽車關稅，由25%降至10%。有分析指，波音會係今次大贏家，受消息帶動，波音股價昨日(8日)顯著造好，一度升逾4%，高見194.75美元，依家值唔值得追入？

潤淼資產管理董事盧志威指，內地原本計劃買波音嘅飛機，但因關稅問題轉買空中巴士(Airbus)或自主生產部分型號，波音無可避免受到影響。佢又話，每次美國同其他國家達成貿易協議，都會推銷波音飛機，希望搶走Airbus生意，不過，其他國家本來就要買波音嘅飛機，所以對佢哋冇特別影響，雖然波音股價短線急升，但估計之後升勢會逐步放緩。