【期匯決算】呢個位買英鎊博得過

【Now財經台】英倫銀行今晚(8日)會公布議息結果，市場普遍預期，面對美國關稅風險，英倫銀行將減息0.25厘，並估計到時會「放鴿」，暗示6月再出手。此外，美國總統特朗普(Donald Trump)話，已經同某個大國達成重大貿易協議，將會喺本港時間今晚有公布，市場估計，英國會係第一個同美國「傾掂數」嘅國家，消息帶動英鎊一度重上1.335水平，但臨近議息結果出爐，英鎊又落返1.327水平，即近期橫行區底部，英鎊應該點部署？

亨達集團助理總經理羅明立指，英鎊最近喺1.345至1.325徘徊，英國的確有條件成為首個同美國達成協議嘅國家，始終美國對英國徵收嘅關稅唔高，英美關係亦唔錯，不過，英國經濟數據仍然偏弱，因此，英倫銀行有機會繼續減息，若英鎊跌穿1.324至1.325水平，可能會跌得更深，另一方面，亦要視乎美匯指數可唔可以上返101水平，如果喺1.31水平買入，後市仲有得博。