【專家分析】茶百道有貨宜趁高食糊

【Now財經台】「五一黃金周」結束，港股及A股今日(6日)復市，個股方面，茶飲股茶百道(02555)喺「五一」期間銷售大增50%，多家非一線城市門店銷量更飆17倍，刺激股價今早一度高見11.58元，勁升逾31%，加上同業滬上阿姨(02589)周四(8日)首掛，茶飲股板塊係咪仲有得炒？

信達國際研究部董事趙晞文指，茶百道只係滬上阿姨嘅影子股，即純粹炒行業基本面，都只係圍繞一個「捲」字。佢又話，雖然整個茶飲市場仍有發展空間，但始終喺細分領域潛在競爭激烈。此外，茶飲市場屬於中低端消費，直接受到嘅衝擊未必好大，所以要更關注店舖營運效益、盈利能力。

晞文提醒，單睇「五一黃金周」數據，茶百道係做得唔錯，但只係受短期因素推動，一個星期嘅長假表現唔等於整季表現，建議投資者考慮趁高食糊離場，如果冇貨，就唔建議現時入場。