【專家分析】資金湧入亞幣因為...

【Now財經台】關稅戰消息日日新，更導致美元受壓，資金甚至轉投亞洲貨幣，帶動多隻亞洲貨幣連日大升，包括兩日已累計升值7%嘅新台幣，點解資金近期會湧入亞洲貨幣？

高富金融集團投資總監梁偉民指，雖然亞洲貨幣係近幾個星期先開始顯著上升，但其實過去兩個月，全球貨幣兌美元都有轉強、升值嘅情況，佢認為主要有兩個原因，分別係美元轉弱及市場炒作。

佢又話，美匯指數1月高位喺110水平，現時已回落至100水平，之前更一度見過98，即美元今年已跌咗10%以上。此外，因市場認為亞洲區國家喺關稅問題上會作出讓步，而其中一個條件係該讓佢哋嘅貨幣升值，從而增加美國競爭力。

不過，Wyman估計，全球貨幣升值情況會開始收斂，因為美匯指數已企穩100水平，相信其他亞洲區貨幣升勢將會放緩，即使再升都僅約1%至2%，短期內難再大升。