【期匯決算】歐元見1.125可買入

【Now財經台】歐洲央行今晚(17日)議息，市場預期，會再減息0.25厘，將會係連續6次會議減息，如果真係減息，會唔會令歐元弱返小小？

亨達集團助理總經理羅明立指，歐洲經濟疲弱，加上有關稅戰，歐央行一定有壓力，所以有機會減息0.25厘，但減埋今次之後可能要觀望一段時間，因為唔知關稅戰會唔會再推高通脹。佢又話，歐元近期曾經升得唔錯，升到1.15水平，現時回落至1.13水平，短期可以考慮喺1.12至1.15進行操作，可以喺1.125水平買入，但切忌高追。