【專家分析】美再針對Nvidia H20出招益咗中芯

【Now財經台】美股「科技7雄」(Magnificent 7)之一嘅英偉達(Nvidia)周一(14日)收到美國政府通知，H20晶片銷售去中國要先獲華府許可，又估計會衍生55億美元開支，拖累Nvidia股價昨晚(15日)盤後挫6%，H20本身係配合美國政策為中國「度身訂造」嘅降級晶片，依家要攞到許可先可以出口，對Nvidia打擊係咪好大？中芯國際(00981)會唔會受惠？

潤淼資產管理董事盧志威指，雖然Nvidia可以申請許可證，但市場仍會擔心關稅、許可證等係點樣運作，所以即時對Nvidia股價造成衝擊。此外，絕大部分買家都會買高階晶片，唔會因貿易禁運或關稅問題調整自身需求，改用低階晶片，所以好難向其他買家銷售H20，華府要求Nvidia攞許可對H20庫存及商業模式都會造成重大打擊。

William續指，當購買外國晶片有困難，相信內地會集中資源，自行研發，中芯本身已經可以製造平靚正嘅晶片，要進一步製造高階晶片只係時間問題，佢認為，依家整個格局都似乎利好中芯。