【槓桿致勝】恒指企得穩21200點樓上可博反彈

【Now財經台】港股今朝(15日)高開逾百點後，好淡爭持，恒生指數昨日(14日)再升逾500點，連升5個交易日，好倉連續5日有資金流出，合共1.9億元，淡倉昨日(14日)繼續有資金流入，5日合計，有約9300萬元坐貨。牛證重貨區喺20400點，亦係最多人加倉嘅位置，熊證重貨區21600點，好淡友都比較進取，重貨貼價熊已被收回，依家大市都係由消息主導，不確定性較大，投資者應該點部署？

胤源世創家族辦公室(香港)第一副總裁黃偉豪指，除咗關税措施，暫時都未知美國總統特朗普(Donald Trump)有冇其他動作，所以市場好難有一個明確方向，所以大部分投資者都揀貼價產品，反映都係做即市部署為主，但要留意近期大市波幅都幾大，過夜嘅收回風險較大，並要留意注碼，由於大市反覆，無論過唔過夜，注碼細返少少會比較合理。

Ravi又指，恒指短期支持位喺100天線，即21200點水平，如果企得穩呢個水平樓上可以博反彈，進一步補返上周一(7日)大裂口。