【FINTERVIEW】點解美國關稅又「未徵先跪」？

【Now財經台】關稅戰再有新發展，美國最新宣布豁免手機、筆記型電腦及部分晶片等20類電子產品嘅對等關稅(Reciprocal Tariffs)，措施適用於中國貨品，美國總統特朗普(Donald Trump)否認電子產品獲豁免關稅，話只係將產品歸入不同關稅類別，獲豁免徵稅嘅電子產品，仍要繳交20%「芬太尼(Fentanyl)關稅」，又指要對半導體及整個電子供應鏈進行評估，並會單獨徵稅，估計半導體關稅喺一、兩個月後出爐，美國突然讓步，背後又有咩原因？

資深經濟學家林樵基指，向電子產品徵收關稅對美國亦冇好處，預期未來焦點會落喺唔同產品嘅徵稅條件，加上中美兩邊金融市場都已經受關稅政策影響要向下，波動亦好急促，投資者對美國市場信心開始下降，將不利發債，目前美國首先要重拾投資者信心，可能隨後會以其他話題轉移大眾視線，始終如果冇人買債嘅話影響會好大，美債一向為低風險、流動性高嘅投資首選，但關稅後投資者會更謹慎，暫時仍要繼續留意政策消息及美國與其他國家嘅關係。