【FINTERVIEW】AI主題要等Q2下半場再炒過

【Now財經台】港股2月至今已累積唔少升幅，所以近日顯著回套，之前由國產人工智能(AI)DeepSeek觸發嘅科網股估值修復係咪暫告一段落？AI概念幾時可以再炒過？

富邦銀行(香港)第一副總裁兼投資策略及研究部主管潘國光指，市場一直好擔心美國嘅關稅政策，只因DeepSeek今年1月突然爆紅，先令市場暫時遺忘咗關稅問題，集中火力炒AI概念，令AI相關股估值重新獲上調。佢又話，雖然美國之前加咗中國關稅，但唔影響市場繼續炒AI概念，但認為4月2日實施嘅對等關稅(Reciprocal Tariff)會對中國有好大殺傷力。

Vicks續指，短線而言，由於科技股之前升咗好多，所以會有獲利回套壓力，而關稅消息會令整固時間更長，加上科技股已有炒過龍之嫌，因此，就算AI主題可以延續落去，可能都要等到第2季後半段時間，所有政策及整固落實完成後，先會再炒AI概念。