【專家分析】美股「見熊」短線All in黃金？

【Now財經台】雖然美國通脹壓力紓緩，但貿戰不斷升級令市場憂慮，美股3大指數昨晚(13日)齊跌至逾半年低位，繼納指後，標指已自2月高位回落逾10%，確認跌入技術調整區，200天線呢個關鍵位喺周一(10日)跌穿後，形勢更難樂觀，反觀金價就再破頂，點睇美股後市？

博威環球證券金融首席分析師聶振邦表示，標指200天線喺5700點以上，昨晚收市報5521點，相差唔夠200點，港股嘅恒生指數一般睇250天線，標指就睇200天線，呢兩個都係長周期盛衰分界線，依家標指已失守200天線，其實已經「見熊」，估計要出現較重大嘅利好消息先會出現明顯反彈，若標指進一步向下，美股投資氣氛就會更差。

金價方面，聶Sir認為，市場十分關注美國經濟放緩情況，近期美元偏軟會利好金價，估計金價未來1個星期企穩每盎司3000美元樓上嘅機會幾大，投資者可以留意今個月可唔可以升至3050美元水平，由於短期冇乜利淡因素，所以金價可以繼續睇好。