【FINTERVIEW】蘇沛豐:恒指仲有10%水位 年底睇25000點

【Now財經台】市場對美國經濟衰退憂慮加深，觸發美股昨晚(10日)大冧市，其中，道指收市暴瀉890點。亞太區股市今朝(11日)幾乎全線向下，其中，恒生指數大幅低開逾500點，之後跌幅逐步收窄，係咪美股對港股嘅影響冇以前咁大？港股後市會點走？

金馬資本管理交易策略師蘇沛豐指，美股跌係因為估值高，市場擔心當地經濟陷入衰退，難免會拖累其他地區嘅股市，加上美國關稅政策主要針對中國，市場擔心或會窒礙中國經濟復甦，一定會對A股及港股帶嚟一定壓力。此外，自DeepSeek推出後，中資科網股大幅反彈，但人工智能(AI)未來係咪可以幫到中國企業改善盈利，甚至令中國經濟增長步伐加快，投資者都要密切留意。

佢認為，恒指再向上重估嘅空間唔大，而現水平有一定整固壓力，今年目標預測市盈率(PE)約11至12倍，估計仍有約10%上升空間，即年底可升至25000點水平。