【名家給力場】關焯照:做Tesla反手部署有得諗

【Now財經台】「科技7雄」(Magnificent 7)之一嘅Tesla，佢嘅創辦人馬斯克(Elon Musk)帶領美國「政府效率部」(DOGE)，大刀闊斧兼手起刀落削政府開支，早前宣布嘅裁員行動已惹怒唔少美國人，就連歐洲方面對佢嘅好感度都急跌，為Tesla業務帶嚟嘅負面影響逐步浮現，除歐洲銷量大跌，股價今個月已累跌近30%，市值累計蒸發3900億美元，有貨嘅投資者應唔應該沽出？

冠域商業及經濟研究中心主任關焯照指，馬斯克做咗一啲其他人唔認同嘅舉動，例如美國國內嘅裁員潮，同埋佢干涉歐洲政治，惹嚟歐洲民眾強烈不滿，導致Tesla喺歐洲銷量暴跌，佢相信，就算美股可以企返穩，Tesla都會繼續跌，加上基本因素唔好，公司都要面對通脹風險，所以Tesla係「7雄」中跌得最甘，又認為短期內都不宜沾手。

關博士建議投資者可以考慮反手部署，例如T-Rex 2X Inverse Tesla Daily Target ETF(TSLZ)等逆向型產品，但投資者必須控制風險，始終Tesla仲未跌完。