【名家給力場】譚仔密謀私有化?
【分析】 2025/02/04 16:17

【Now財經台】「譚仔」及「譚仔三哥」曾一度分家,其後喺2017年先後被日資丸龜製麵(Marugame Seimen)母企東利多控股(Toridoll)收購,經重組後,2021年以譚仔國際(02217)喺本港掛牌上市,當初收購兩間公司作價折合港元約22億元,但目前市值就跌至約12億元。今朝(4日)開市前譚仔國際突然停牌,公司話等待緊發布構成內幕消息嘅公告,今次停牌會唔會係有大股東想公司私有化?
《香港股票財技密碼》作者梁杰文認為,依家公司股價相對低殘,成交量又唔多,股東無可能供股集資,所以,停牌好大機會係因為股東商量緊私有化部署。
Mike又話,現時大部分股東帳面上有虧損,如果私有化作價唔算高,股東未必同意私有化,加上大股東已持有約75%股權,所以,以全購方式私有化嘅可能性極低。不過,如果用協議安排私有化,就只需要超過75%出席股東同意,並有唔超過10%獨立股東反對,就可以通過私有化方案,成事機會更大。
![]() | 梁杰文 《香港股票財技密碼》作者 |