【名家給力場】關焯照:港股散戶唔使減磅過年
【分析】 2025/01/24 16:22

【Now財經台】美國總統特朗普(Donald Trump)最新表示,如非必要唔會加中國關稅,市場解讀得非常正面,但仍要等到2月1日先有最終決定,下星期就係農曆新年長假,港股下周只有1日半市,港股放假期間,美國有唔少大事件,「科技7雄」(Magnificent 7)會出業績、聯儲局議息及關稅死線,投資者應該點部署?
冠域商業及經濟研究中心主任關焯照認為,投資者唔需要「減磅」過年,因預期大市喺農曆新年長假前好會有得升,除非大市已見頂,依家恒生指數喺20000關上落,有貨嘅投資者可以等過年後,等港股復市睇定啲再做決定。
美股「7雄」業績方面,關博士話,唔需要太擔心,因為現時美股嘅權重股如金融股等,交到好業績後,股價炒上後都冇回落,呢個主要同美國總統特朗普正式上場有關。
佢續指,「7雄」之中,Meta、亞馬遜(Amazon)、Google都會喺業績前炒起,市場預期呢啲公司業績唔會太差,唯一要擔心係蘋果公司 (Apple Inc.),因為昨晚(23日)納指自低位反彈,但Apple都跟唔上,市場普遍認為,Apple已經冇新意,手機銷售又唔理想,除非公司有重大消息或產品發布,股價先有望出現突破,否則,唔建議投資者持有。
![]() | 關焯照 冠域商業及經濟研究中心主任 |