【名家給力場】港新股市場2025年會愈來愈旺？(下)

【Now財經台】公開招股超額認購近6000倍，史上第3大「超購王」，全城瘋搶嘅玩具新股布魯可(00325)今日(10日)首掛，股價表現十分對辦，更一度變成「紅底股」。事實上，近期招股嘅新股，好多隻認購反應都好熱烈，雖然呢啲熱爆新股上市後，唔係隻隻都對辦有好表現，但係咪反映新股市場喺2025年可以全面復甦？

勝利瑞柏基金管理合伙人暨投資總監陳建良相信，內地監管當局未來會為更多內企境外上市「開綠燈」，香港就係主要選項，加上依家喺美國掛牌嘅中概股，亦有誘因嚟香港上市，呢啲股份會成為新股市場嘅催化劑，佢估計，今年港股嘅新股市場將會比前幾年熾熱。

KL補充，雖然新股類型多元化，亦預期今年會好多新股排隊上市，但優質嘅新股好難抽得多，質素唔好嘅又未必會入飛抽，加上部分新股上市後跌穿招股價，所以佢傾向觀望新股市場，好少「落場」抽新股。KL又提醒，不妨多留意新式零售股，因為業務較創新會有較大市場。