【專家分析】「以舊換新」汽車補貼冇加碼無礙銷售？

【Now財經台】國家發改委今早(8日)指出，已下達810億人仔用作2025年消費品「以舊換新」資金，但新能源車補貼冇加碼，2024年嘅補貼金額逾百億人仔，今年汽車會分到幾多補貼？睇返去年，因為有補貼帶動全年汽車銷量創新高，但會唔會已經消化咗一輪換車需求，令今年嘅補貼刺激作用細咗？

元宇證券基金投資總監林嘉麒指，雖然下達金額少過去年，但唔等於全年目標，依家呢筆錢未有細分畀咩產品做補貼，如果市場反應好唔排除會加碼，由於呢筆錢嘅數目可能令市場失望，呢種負面情緒或會影響相關股份嘅股價表現。

KK又指，每逢年初市場都會擔心汽車需求問題，但睇返內地全國汽車比例，有近半唔係新能源車，呢個滲透率會反映喺銷售層面。金額方面，雖然單架補貼冇加碼，但依家內地新能源汽車生產商不斷出現「內捲」情況，當成本及價格下跌，如果有補貼仍有機會吸引到市民買新車，所以唔使睇得太悲觀。