【專家分析】特朗普定Tesla股價生死

【Now財經台】美國電動車巨擘Tesla今晚(2日)會出2024年第4季及全年交付數據，市場估計，上季交付量約50.6萬架，呢個預測是好是壞？Tesla之前係「Trump Trade」大贏家之一，股價一度炒上480美元水平，不過，隨著「Trump Trade」熱潮近期降溫，Tesla股價亦回落至400美元水平，今晚出爐嘅交付數據，對股價有冇影響？

耀才證券研究部總監植耀輝指，如果數據唔係同預期有好大落差，應該對股價影響唔大，特朗普(Donald Trump)當選後，Tesla股價如坐火箭，加上資金炒作科技相關概念，例如近期熱炒嘅機械人概念，而Tesla都有涉足呢個範疇，呢啲因素都可以令Tesla維持升勢。

不過，Stanley提醒，特朗普今個月正式上任後，Tesla股價唔一定受惠，因為特朗普有部分政策存在矛盾，例如一方面要放寬自動駕駛監管，但另一方面為燃油車鬆綁，不利Tesla等電動車企發展。

佢又指，如果美股行情唔差，Tesla股價表現唔會太差，相反，如果大市氣氛轉差，加上特朗普嘅政策對Tesla不利，Tesla股價好大機會調整。