【專家分析】思摩爾至少未來半年唔使睇

【Now財經台】思摩爾國際(06969)向主席等人發購股權，明年至2030底前，期間連續15個交易日平均市值達到或超過3000億至5000億元，就可以行使最少30%購股權。2020年底至2021年初，思摩爾股價處於89元水平，高峰時期市值近5000億元。不過，公司今年上半年只係賺逾7億人仔，假設下半年表現差唔多，即係全年賺約14億人仔，未來盈利係咪好難重返高峰？股價跌至現水平係咪入場嘅好時機？

元宇證券基金投資總監林嘉麒指，思摩爾盈利表現同2022年、2023年有一段距離，相信好難重返近5000億元市值嘅高峰，現時市盈率(PE)逾40倍，除咗要睇港股整體氣氛外，公司估值方面，亦要市場願意畀一個更高嘅溢價，先可以做到3000億元嘅市值目標，因此，思摩爾要實現呢個目標嘅機會唔高。

KK又話，不論業務狀況、市場氣氛都好難令思摩爾喺幾年後達標，佢建議，投資者可以留意公司未來半年至1年表現，再作部署。